Author: admin

არაგადამდებ დაავადებებთან (აგდ) დაკავშირებული საკითხების ეფექტური ადვოკატირებისთვის საჭირო უნარ-ჩვევების გასაძლიერებლად და მასმედიასთან აქტიური თანამშრომლობის ხელშეწყობად, საქართველოს არაგადამდებ დაავადებათა პრევენციის ალიანსის ორგანიზებით, 30 ნოემბერი-1 დეკემბერს ჩატარდა ერთობლივი ტრენინგ-სემინარი აგდ ადვოკატებისა და მასმედიის წარმომადგენლების მონაწილეობით. სემინარი ფოკუსირებული იყო აგდ-ის საკითხის აქტუალურობაზე, მედია ადვოკატირების მნიშვნელობაზე, კომუნიკაციის უნარების გაუმჯობესებასა და ერთიანი გეგმების შედგენაზე. აღნიშნულმა სემინარმა ხელი შეუწყო მონაწილეთა უნარების გაძლიერებას, გავლენა მოახდინონ პოლიტიკის შემუშავებლებსა და საზოგადოებრივ აზრზე, გააუმჯობესა თანამშრომლობა აგდ ადვოკატებსა და ჟურნალისტებს შორის, რასაც შეიძლება გააჩნდეს მნიშვნელოვანი გრძელვადიანი ეფექტი.

ჯანმრთელობის მსოფლიო ორგანიზაციამ, საქართველოს არაგადამდებ დაავადებათა პრევენციის ალიანსთან ერთად ჩაატარა ფორუმი „პოლიტიკის დიალოგი: სიმსუქნის პრობლემის დაძლევა საქართველოში – მტკიცებულებებიდან ქმედებამდე“, რომელსაც დაესწრნენ ექსპერტები და პოლიტიკის შემქმნელები მრავალი სექტორიდან, სიმსუქნის მზარდი პრობლემის გადასაჭრელად. ფორუმი იყო პირველი მასშტაბური, მრავალსექტორული ღონისძიება საქართველოში სიმსუქნის საკითხებზე. დამსწრეებმა ხაზი გაუსვეს საქართველოში სიმსუქნის ტვირთს და ამ სფეროში სახელმწიფო პოლიტიკის შემუშავების აუცილებლობას.

2024 წლის 10 ოქტომბერს გაიმართა პროექტის “არაგადამდებ დაავადებათა პრევენციის ადვოკატირების ეროვნული დღის წესრიგი“ გახსნითი შეხვედრა. პროექტი დაფინანსებულია არაგადამდებ დაავადებათა ალიანსის (NCD Alliance) მიერ და მას ახორციელებს ‘საქართველოს არაგადამდებ დაავადებათა პრევენციის ალიანსი’. პროექტის ძირითადი მიზანია არაგადამდებ დაავადებათა ადვოკატირების ეროვნული დღის წესრიგის შემუშავება, რომელიც გაითვალისწინებს საქართველოში ქრონიკულ დაავადებათა მქონე პირების საჭიროებებს და შემუშავდება დაინტერესებულ მხარეთა აქტიური ჩართულობითა და მონაწილეობით.